rnd's website logonasin tenpo pi toki pona

nasin tenpo

mi pali e nasin pi nanpa tenpo tawa toki pona. nasin mi li lawa ala. sina wile kepeken e ona la, sina ken. taso, nasin tenpo ante li lon.

toki mute la, tenpo suno wan li jo e tenpo Ola 24. tenpo Ola wan li jo e tenpo Minuta 60. nasin ni la, nanpa li suli, li ike tawa toki pona.

nasin mi li kepeken e nanpa ni taso: nanpa "ala" en "wan" en "tu" en "mute".

tenpo suno li tu tawa wan tu wan. wan ni li sama tenpo Ola 8.

  • tenpo pimeja (open lon 00:00, pini lon 07:59)
  • tenpo laso (open lon 08:00, pini lon 15:59)
  • tenpo loje (open lon 16:00, pini lon 23:59)

sina ken toki e wan suli pi tenpo ni kepeken nanpa. wan suli li sama tenpo Ola 2.

  • wan ____ nanpa ala (+00:00)
  • wan ____ nanpa wan (+02:00)
  • wan ____ nanpa tu (+04:00)
  • wan ____ nanpa mute (+06:00)

"wan pimeja nanpa wan" li open lon 02:00, li pini lon 03:59. "wan loje nanpa tu" li open lon 20:00, li pini lon 21:59.

sina ken sitelen e wan ni kepeken nimi lili:

  • "wan pimeja nanpa ala" -- "pimeja:0" anu "pimeja:ala"
  • "wan loje nanpa tu" -- "loje:2" anu "loje:tu"
  • "wan laso nanpa mute" -- "laso:3" anu "laso:mute"

sin la, sina ken tu e wan lili kepeken nanpa sin. wan lili li sama tenpo Minuta 30.

  • wan ____ pi nanpa ___ en ala (+00:00)
  • wan ____ pi nanpa ___ en wan (+00:30)
  • wan ____ pi nanpa ___ en tu (+01:00)
  • wan ____ pi nanpa ___ en mute (+01:30)

"wan pimeja pi nanpa tu en tu" li open lon 05:00, li pini lon 05:29. "wan loje pi nanpa mute en wan" li open lon 22:30, li pini lon 22:59.

sina ken sitelen e wan ni kepeken nimi lili:

  • "wan pimeja pi nanpa ala en wan" -- "pimeja:0:1" anu "pimeja:ala:wan"
  • "wan loje pi nanpa tu en tu" -- "loje:2:2" anu "loje:tu:tu"
  • "wan laso pi nanpa mute en ala" -- "laso:3:0" anu "laso:mute:ala"

ilo tenpo

ilo tenpo ni li ken.

ilo tenpo pi ilo suno

sitelen pi ilo tenpo pi ilo suno

ilo tenpo ni li pana e sona tenpo kepeken ilo suno lili. ona li ken pana e sitelen tu wan.

sitelen nanpa wan li toki e nimi "pimeja" anu nimi "laso" anu nimi "loje".

sitelen nanpa tu en sitelen nanpa tu wan li toki e nanpa "ala" anu nanpa "wan" anu nanpa "tu" anu nanpa "tu wan".

ilo tenpo sike

sitelen pi ilo tenpo sike

ilo tenpo ni li pana e sona tenpo kepeken palisa tu.

ilo nanpa wan la, palisa lawa (lili) li toki e wan tenpo. palisa anpa (suli) li toki e wan suli, e wan lili.

ilo nanpa tu la, palisa lawa li toki e wan tenpo, e wan suli. palisa anpa li toki e wan lili.

ilo tu ale li toki e ni: tenpo "pimeja:tu:wan" li lon.

Follow me on Mastodon This page made with Vim Best viewed in Firefox jan li lukin e lipu ni lon tenpo mute Trans Rights Now!